A Ponte Maceira

A Ponte Maceira é unha pequena aldea da parroquia de Portor en Negreira, recibe o seu nome da ponte que hai no lugar e que comunica o concello de Negreira co de Ames.

O lugar posúe unha gran beleza paisaxística, tanto o propio curso do río Tambre coma o conxunto de construccións que rodean a ponte.

No lugar pódense ver excelentes mostras da arquitectura popular galega como casas señoriais, muiños, unha capela e un pazo.

COMO CHEGAR

Para chegar o mellor é ir desde Santiago pola estrada de Noia (AC-543), e despois en Bertamiráns (Ames) coller a estrada a Negreira (AC-544), e logo desviarnos cando indique "Ponte Maceira". Senón tamén podemos vir pola nova autovía Santiago-Noia, e coller a saída de Negreira.

O CAMIÑO

Por enriba desta ponte pasa o último tramo do camiño francés, o que vai dende Compostela ata Fisterra. Camiño que percorren os peregrinos para ver o que, noutro tempo, foron os confins do mundo. De feito a construcción desta ponte débese á petición da Mitra Compostelana no século XIV. A ponte é medieval, aínda que se construíu sobre unha base romana doutra ponte anterior, no entanto é común escoitar dicir que a ponte pertence á época romana

Estreitamente ligado coa historia desta ponte está o escudo do Concello de Negreira, aínda que existen dúbidas de que sexa esta a ponte que se representa no escudo, senón unha xa desaparecida que tamén cruzaba o Tambre, pero noutra parróquia de Negreira. O escudo mostra un soldado romano que persegue os discipulos de Santiago, Teodoro e Atanasio, cando trasladaban os restos do apostolo para darlle descanso en Compostela. Cando estes últimos conseguen cruzar a ponte, esta derrúbase milagrosamente deixando atrás ó soldado romano que os persegue.

A CAPELA E O PAZO

Ó pasar a ponte dende a ribeira de Ames cara a de Negreira, o primeiro que se cruza na nosa vista é a capela de San Brais e, máis á dereita, o pazo de Baladrón.

O pazo de Baladrón é de construcción recente, da segunda metade do século pasado, mais está perfectamente integrado na paisaxe enxebre de horreos e pombais que o rodea. É lugar de vacacións de actores e famosos, que nalgúns casos se deixan ver polo campo da festa o día do santo do lugar. De feito, o pasado ano foi escenario dunha película de Antonio Hernandez. O filme en cuestión é "El Menor de los Males", película que vale a pena vela, magnifica interpretación de Carmen Maura, salpicada con pingas de humor ácedo.